Ushtria ukrainase tërhiqet nga Avdiivka, Donetsk e ushtria ruse ka ngritur tashmë flamurin në qendër. Forcat ruse morën nën kontroll qytetin e Avdivkës, pas vendimit të ushtrisë ukrainase për të tërhequr trupat.
Beteja për Avdivkën zgjati disa muaj, dhe konsiderohet edhe më e përgjakshme se ajo për qytetin e Bakhmutit. Sipas autoriteteve ukrainase, mbi 5000 ushtarë rusë vdiqën në tentativë për të pushtuar qytetin, dhe më shumë se 3000 mjete të rënda ushtarake ruse u shkatërruan.
Edhe pse përballë mungesës së municioneve për ushtrinë e tij, rezulton si oksigjen për Kievin pakti dy palësh i Zelenskyt me Berlinin dhe Parisin me premtimin e ndihmës së re ushtarake sipas modelit të asaj të nënshkruar tashmë me Londrën.
Megjithatë, të gjithë sytë mbeten te Shtetet e Bashkuara, pas ndalimit të një pakete të re ndihme. Scholz, në një konferencë për shtyp, i bëri thirrje Kongresit Amerikan që të “autorizojë vendimet e nevojshme për të garantuar mbështetjen” për Ukrainën, duke pasur parasysh se mbështetja e SHBA mbetet “thelbësore” për Kievin.
Senati amerikan miratoi të marten, e 13 shkurtit një paketë ndihmash prej 95 miliardë dollarësh për Ukrainën, Izraelin dhe Tajvanin. Nga kjo shumë 60 miliardë dollarë janë ndihma për Ukrainën, por fati I këtij pr/ligji mbetet i paqartë, pasi republikanët që kontrollojnë Dhomën e Përfaqësuesve kanë sinjalizuar se nuk do të mbështesin këto masa.
