“Mos shit cigare në këtë zonë, se do të të vras”. Kërcënimi në fjalë është bërë nga një shitës ambulant i orëve të pasmesnatës në rrugën “Abdi Toptani”, në Tiranë. Personi i kërcënuar ka qenë një tjetër tregtar ambulant.
Konflikti për territorin e shitjes së cigareve, i cili ka precipituar dhe në përplasje fizike, ka përfunduar në Gjykatë, kur i pari ka kanosur me një thikë të dytin.
Pak ditë më parë, Gjykata e Tiranës përfundoi gjykimin ndaj të pandehurve Altin Sina dhe Roland Koltraka. Ata u shpallën të fajshëm për akuzën e “kanosjes” dhe u dënuan me nga 8 muaj burg.
Në të njëjtin vendim, Gjykata urdhëroi lirimin e tyre nga qelia, për shkak se dënimi ishte konsumuar me kohën e paraburgimit. Referuar vendimit të Gjykatës, ngjarja për të cilën u përgjigjën para drejtësisë të pandehurit Sina e Koltraka është shënuar në 11 dhjetor të vitit të kaluar.
Rreth orës 01:00 të natës të kësaj date, kallëzuesi i tyre, Arjan M., ka qenë duke kaluar në rrugën “Abdi Toptani”. Arjan M. dhe dy të pandehurit në orët e vona të mbrëmjeve tregtonin cigare, pranë hyrjeve të lokaleve të natës në atë zonë.
I dëmtuari Arjan M. ka pretenduar se për shkak të konkurrencës për territor, para kësaj dite ka pasur kërcënime me jetë nga i pandehuri Koltraka. Sipas kallëzuesit, Koltraka e kishte kërcënuar për të mos shitur cigare në atë zonë, duke e kanosur edhe me një thikë.
Mbrëmjen e ngjarjes, të pandehurit Altin Sina dhe Roland Koltraka kanë shkëmbyer fjalë me të dëmtuarin Arjan M.
Për shkak të konfliktit të ndarjes së territorit të shitjes se paketave me cigare duhani, i pandehuri Roland Koltraka ka debatuar në distancë me të dëmtuarin Arjan. Ai e ka kanosur përmes një thike, që, sipas Gjykatës, nuk plotësonte kushtet e armës së ftohtë, si edhe e ka goditur me grushte të dëmtuarin.
Gjatë këtyre veprimeve ai është ndihmuar edhe nga i pandehuri Sina. Pas këtij momenti, i dëmtuari ka lajmëruar shërbimet e Policisë, të cilat i kanë gjetur të tre të përfshirët në konflikt pranë ish-godinës së Partisë Demokratike.
Sipas vendimit të Gjykatës, fillimisht i dëmtuari Arjan M. ka pretenduar se dy të pandehurit kanë dashur ta grabisin. Për këtë shkak, dosja në ngarkim të të pandehurve u dërgua për gjykim për akuzën e “grabitjes me dhunë”.
Gjatë gjykimit, trupi gjykues vlerësoi se veprimet e kryera nga të pandehurit tregojnë se ata kanë pasur qëllimin kriminal, dashjen direkte, për të kanosur seriozisht të dëmtuarin për territorin e tregtimit të cigareve. Për këtë shkak ata u fajësuan për akuzën e “kanosjes”./Panorama
