Nënkryetari i LSI-së Luan Rama dhe Kejdi Mehmetaj ishin të pranishëm sot në një ekspozitë ku artistë të rinj ekspozuan piktura dhe fotografi të ndryshme. Ekspozita “Melodi” e cila u organizua në Muzeun Historik Kombëtar, mblidhte punimet e disa të rinjvë mbështetur nga LSI.
Duke përfituar nga ky takim, Luan Rama mbajti edhe një fjalim ku shprehu mbështetjen e pa kufizuar të Lëvizjes Socialiste për Integrim për artistët.
“Është një melodi e bukur kjo sepse në këto telajo apo në gjithçka që është këtu edhe në punimet në skulpturë apo edhe në fotografi, është përjetimi, është shpirti artistik i atyre që i kanë realizuar këto vepra.
Dhe kjo mënyrë komunikimi që këta artistë realizojnë me ne, që jemi publiku, shikuesit, është sa e veçantë, është sa e vështirë, por po aq edhe e bukur dhe emocionuese.
Më lejoni të garantoj në mbështetjen pa asnjë gramë politikë brenda. Në mbështetjen maksimale që ne, që kemi një atribut përfaqësimi politik, ta shfrytëzojmë këtë atribut për të krijuar lehtësirat e nevojshme dhe mundësitë që shpirti artistik, dhe në këtë rast jo vetëm i piktorëve, skulptorëve apo fotografëve, por shpirti artistik i cilitdo që ndien një përjetim artistik dhe këtë përjetim kërkon t’ia transmetojë edhe publikut, ne ta mbështesim, ta inkurajomë dhe të krijojmë sa më shumë hapësira”, tha Luan Rama, duke vijuar: “Sepse në fund të fundit, çdo vepër arti, nëse nuk është e destinuar të shkojë te shikuesi, te publiku, mbetet pa jetë dhe praktikisht nuk përmbush misionin e vet. Për melodinë e shpirtit të artistëve ka shumë nevojë politika, që është kaq e vrazhdë, është kaq refraktare, pa asnjë gramë meditimi dhe përjetimi emocional.
Guximi dhe këmbëngulja e ju të rinjve që nga kjo pikëpamje jeni vërtet për t’u admiruar. Arti është për të gjithë dhe le ta përjetojmë këtë si një ngjarje të bukur artistike me urimin për më shumë sukses dhe për më shumë mbarësi për të gjithë ju”, u shpreh Nënkryetari i LSI-së, Luan Rama
