Partia Socialiste është tërhequr pas presionit të Lëvizjes Socialiste për Integrim dhe ka pranuar të ndryshojë projektligjin “Për masat shtesë të sigurisë”.
Projektligji parashikonte detyrimin ligjor për të gjitha institucionet shtetërore dhe bizneset private për të vendosur kamera sigurie me rezolucion të lartë në ambientet e tyre. Ligji iu rikthye Kuvendit në muajin prill nga Presidenti Nishani, duke e quajtur si antikushtetues nismën, shkruan“Panorama”.
Por PSja kërkoi që projektligji të mbetej i pandryshuar, gjë e cila u kundërshtua nga LSIja. Që prej muajit prill, dekreti i presidentit ka mbetur në Kuvend, për shkak se kërkon minimalisht 71 vota për ta rrëzuar, vota të cilat PSja nuk i bën pa LSInë. Dje ministri i Brendshëm, Saimir Tahiri, dhe deputeti i PSsë, Pirro Lutaj, kanë zhvilluar një takim pa media me kryetarin e Komisionit të Sigurisë, Spartak Braho, dhe kreun e Grupit të LSIsë,
Petrit Vasili, për të negociuar lidhur me rrëzimin e dekretit të presidentit.
Pas negociatave, Partia Socialiste është tërhequr dhe ka pranuar të riformulojë nenin që i detyron bizneset për të vendosur kamera. Në formulimin e ri është parashikuar që kamera do të vendosin me detyrim vetëm ato biznese që, sipas analizës së Policisë, rezultojnë se kanë rrezikshmëri të lartë.
Këtë fakt e konfirmoi kryetari i Grupit të LSIsë, Petrit Vasili. “Dakordësimi është ky: nuk do të ketë detyrim automatik për të gjithë, por detyrim që rrjedh, dhe kjo është përcaktuar tashmë qartë në ligj, vetëm aty ku vlerësohet nga analiza e riskut për subjektet që kanë rrezik të shtuar sa i takon sigurisë”, deklaroi dje Vasili pas takimit.
Ministri i Brendshëm, Saimir Tahiri, i pyetur rreth negociatave me LSInë për të rrëzuar dekretin e presidentit dhe miratuar ligjin “Për masat shtesë të sigurisë”, tha se kishte besim se drafti do të votohej nga deputetët.
“Dhe unë shumë besimplotë me deputetët do të gjejmë gjuhën për ta miratuar (ndoshta jo këtë të enjte, të enjten tjetër) projektligjin që kam propozuar ‘Për masat shtesë të sigurisë’. Është një projektligj i domosdoshëm. Jemi të fundit në Ballkan dhe në rajon që nuk kemi ende një ligj të tillë.
Ndaj unë e kuptoj me shumë dashamirësi shqetësimin e çdo deputeti, i mirëkuptoj vërejtjet e tyre. Jam shumë i gatshëm për t’i marrë parasysh. Dua t’u garantoj çdo deputeti, çdo grupi parlamentar dhe mbi të gjitha qytetarëve, miratimin e akteve ligjore në Parlament, që do të na sjellë më shumë siguri në Republikën e Shqipërisë”, u shpreh Tahiri.
