LONDER- Një ditë pas ngjarjes së rëndë në metronë e Londrës ku një person sulmoi me thikë udhëtarët, mësohet se bëhet fjalë për një sulm të mirëfilltë terrorist. Media ndërkombëtare referuar burimeve zyrtare policore thotë se personi i arrestuar ka thënë se e ka kryer këtë sulm për Sirinë.
Sulmi i kryer dje në mbrëmje në portikun e stacionit të metrosë “Leytonstone” në lindje të kryeqytetit vjen pak ditë pasi Parlamenti britanik miratoi ndërhyrjen e sulmeve ajrore në Siri kundër grupit të Shtetit Islamik.
Ky është incidenti i parë xhihadist në Londër që nga vrasja e një ushtari britanik përpara kazermës së tij në kryeqytetin britanik në maj të vitit 2013.
Tre nga të plagosurit, njëri prej tyre në gjendje të rëndë pasi është goditur në fyt, janë dërguar urgjent në spital. Policia arriti ta neutralizojë agresorin në fjalë, duke përdorur pistoletë elektrike me voltazh të lartë.
VIDEO/ Sulmi me thikë në metro, agresori thërret “kjo është për Sirinë”
