Lulzim Basha: Koha e korrupsionit, perversitetit, mashtrimit, goja e Edi Ramës shkeli mbi dinjitetin e çdo shqiptari. Ora kur një njeri i vetëm me ndihmën e krimit, pasi vodhi votat, vodhi paratë dhe u përpoq t’i vidhte shpresën njerëzve, ka mbaruar nga ky shesh ku jepet verdikti i popullit sovran. Rama ik! Sovrani e ka marrë vendimin. Prej javësh ajo godinë nuk është më godina e Kuvendit të Shqipërisë, por karantinë e kolerës së krimit. Ne ikëm të painfektuar nga joshja me karriget e pushtetit. Zoti pastë mëshirë për shpirtrat e tyre.
Zëri juaj ka pyetur me kohë, kur do t’i digjni mandatet, zëri juaj u dëgjua. Unë kam privilegjin që në emër të popullit sovran të shpreh mirënjohjen time ndaj qindra zonjave dhe zotërinjve që djegin sot mandatet e tyre për popullin sovran. Kjo është beteja për Shqipërinë e vlerave. Më 16 mars populli sovran, edhe më shumë, edhe më fort, edhe më i vendosur se kurrë më parë, do të marrë në dorë fatin e tij. Është rrethuar me tela me gjemba, shpallja e një regjimi ushtarak është shenjë e këputjes së sistemit kriminal të Edi Ramës. Sa për Edi Ramën, edhe sot si çdo herë tjetër ia ka mbathur, të shpërndajë gënjeshtrat dhe mashtrimet e tij në ekranin e Italisë fqinje. Të paktën kështu thotë, se burime mike thonë ka shkuar të negociojë azilin politik, pak rëndësi ka, fatin e tij e ka vulosur populli
Monika Kryemadhi: Shërbëtorët e trafikut të drogës sot më shumë se kurrë kanë frikë. Ata mendojnë që ne do të lodhemi. Sot asnjë nga ne nuk përfaqëson parti politike. Sot dua t’ju them diçka. Rama ka dështuar. Rama dështoi me politikat e tij, dështoi me vendet e reja të punës. Rama dështoi me taksat e larta, Rama dështoi me policinë. Të helmosh motrat dhe vëllezërit e tua ka dy arsye. Një ose je kriminel dhe vrasës, dhe tjetra ose je i çmendur dhe ke hakmarrje për të tjerët. Nuk mund të lejojmë Edi Ramën që të varfërojë shqiptarët dhe t’i detyrojë ata të largohen nga Shqipëria. Ka më shumë se 3 muaj që banorët e Unazës së Re kanë denoncuar një falsifikim, kanë denoncuar një vjedhje si ajo që ka bërë “DH Albania” e cila vodhi 18 milionë Euro. Kam dëshirë të dëgjoj Prokurorinë Shqiptare ku është me falsifikuesin e firmës. Çfarë po bën prokuroria me Damian Gjiknurin, çfarë po bën prokuroria me Arben Ahmetajn që bilbilos sot në Parlament si nuse e bukur me paratë që ka vjedhur. Ne do të jemi çdo seancë parlamentare këtu, do të shkojmë ku të shkojnë këta. As plumbat nuk kanë për t’i ndaluar qytetarët, ashtu siç nuk i ndaluan në ’90, ashtu siç nuk i ndaluan në ’97, as tani nuk do t’i ndalojnë sepse e drejta është me ne.
Fatmir Mediu: Falënderoj të gjithë ata të rinj dhe të reja që nuk pranuan mandatin. Mandatet nuk janë të PD-së, por të shqiptarëve. Sot kemi vendosur interesin e Shqipërisë, lirinë na i ka marrë peng Edi Rama me kriminelët. Qëllimi ynë është ta bëjmë Shqipërinë Europiane. Europa është bërë një ëndërr që po largohet gjithnjë e më shumë për shqiptarët. Kjo qeveri ka ndërtuar një mur të fëlliqur me shqiptarët. Kjo qeveri jo vetëm ka shitur interesat tuaja por dhe interesat kombëtare.
Kiri Hajdari: Amaneti i Azem Hajdarit qëndron tek ju dhe gjithë demokratët shqiptarë.
Opozita e bashkuar protestoi përpara Parlamentit në të njëjtën kohë që zhvillohet seanca plenare. Në Pedonalen para Parlamentit dhe në rrugët lidhëse ishin vendosur forca të shumta policore. Pedonalja është e mbyllur dhe nuk lejohet kalimi i personave të tjerë. Një kordon policor ka bllokuar kalimin në këtë rrugicë që lidhet me Parlamentin. Efektivë të shumtë, rreth 1 mijë të tillë, kanë marrë masa për të mos lejuar protestuesit që të afrohen në sheshin përpara Parlamentit.
