Pas përfundimit të mbledhjes së Këshillit Politik pasditen e djeshme, mazhoranca dhe opozita kanë shkëmbyer deklarata përmes së cilave fajësojnë njëra-tjetrën për mos arritjen e dakordësisë për çështjen e listave të hapura.
Gjiknuri deklaroi dje se opozita nuk ka pranuar të diskutoj në Këshillin Politikë për listat e hapura, por kjo e fundit ka reaguar duke e cilësuar përfaqësuesin e mazhorancës gënjeshtar.
Sipas reagimit të përfaqësuesve të opozitës, ata janë të gatshme të përfshihen në çdo diskutim që nuk dëmton marrëveshjen e reformës zgjedhore të arritur më 5 qershor.
Për këtë arsye ata kërkuan mbrëmjen e djeshme që mbledhje e radhës së Këshillit Politik të mbahet pasditen e sotme.
Kësaj kërkese Përfaqësuesi i mazhorancës në Këshillin Politik, Gjiknuri, iu përgjigj duke thënë se mbledhja e radhës do të mbahej vetëm pasi opozita të deklaronte propozimet konkrete për çështjen e ndryshmeve kushtetuese.
Por, mëngjesin e sotëm, Gjiknuri përmes një E-maili drejtuar Bylykbashit dhe Vasilit, konfirmon pjesëmarrjen e tij në mbledhjen e sotme të Këshillit Politik, e cila do të mbahet rreth orës 17:30.
E-MAILI NGA DAMIAN GJIKNURI
Ju rikujtoj se në mbledhjen pesë orëshe të datës 21 Korrik, thërritur prej nesh, ju është prezantuar nisma e opozitës parlamentare për ndryshime në Kushtetutën e Republikës së Shqipërisë, procedura e ndjekur nga Kuvendi, varianti i dakordësuar dhe miratuar nga Këshilli i Rregullores dhe Komisioni Parlamentar për Çështjet Ligjore, Administratën Publike dhe të Drejtat e Njeriut bashkë me relacionin përkatës.
Ndonëse dokumenti ka qenë krejtësisht publik, në faqen zyrtare të Kuvendit, ashtu sikurse të gjitha seancat e zhvilluara në komisione kanë qenë të hapura e publike, meqenëse ju deklaruat se ishit në mungesë dijenie, ju dorëzua edhe zyrtarisht një kopje nga sekretaria e Këshillit Politik.
Në kushtet kur ju pranoni mungesën e propozimeve konkrete të cilat do duhej të ja dërgonit paraprakisht anëtarëve të Këshillit dhe duke vlerësuar gjithësesi gatishmërinë tuaj për tu takuar, ju konfirmoj pjesëmarrjen në mbledhje./ Opinion.al
