Ministrja e Arsimit, Lindita Nikolli ka folur për herë të parë pas sulmit që iu bë më 17 nëntor nga studentja Mirela Ruko e Lëvizjes për Universtitetin, ku iu hodh salcë nga koka.
E ftuar në emisionin “Studio e Hapur” në “News24” për sulmin Lindita Nikolli tha se protestuesit janë në të drejtën e tyre të protestojnë, e më tej ajo nuk ka dashur të komentoj incidentin e ndodhur tek Piramida. “Ka pak për të folur, nuk kam dëshirë ta komentoj shumë. Protestuesit janë të lirë dhe në të drejtën e tyre të protestojnë. Iku koha kur protestuesit vriteshin në mes të bulevardit. Megjithatë, Mirelën do ta shoqërojë ky gabim, jo se derdhi salcën në kokën time, por se është përfshirë në një grupim politik që nuk ka lidhje me demokracinë, por është një grup anarkik”, është shprehur Ministrja e Arsaimit Lindita Nikolli.
Po ashtu lidhur me përjetimin, Lindita Nikolli tha se ajo nuk e kishte marrë personalisht sulmin. “Unë isha aty dhe veprimet e mia e tregojnë se si e përjetova. Një shoqja ime më telefonoi dhe më përmendi një shprehje të Clintonit dhe unë ashtu e kam përjetuar këtë sulm, seriozisht për të reflektuar se cilat janë kërkesat e studentëve”, tha Nikolli. Nikolli tha se Mirela Ruko nuk ka bërë asnjë ankesë në kancelari se kishte probleme me pagimin e shkollës. “Ajo nuk ka asnjë letër në kancelari ku të thotë se nuk mund të paguajë dot universitetin”, është shprehur Nikolli.
