Vendet arabe do të mbështesin një plan prej 53 miliardë Dollarësh për rindërtimin e Rripit të Gazës për të rivalizuar idenë e Donald Trumpit për shpërnguljen e më shumë se 2 milionë palestinezëve në vendet fqinje.
Plani i hartuar nga Egjipti mori mbështetjen e vendeve të Ligës Arabe, gjatë samitit të zhvilluar në Kajro, ku i pranishëm ishte edhe Sekretari i Përgjithshëm i Kombeve të Bashkuara Antonio Guterres.
Plani 91 faqësh përmban edhe këto fotografi të projekt-ideve se si duken zona të ndryshme të Rripit të Gazës pas rindërimit, sipas variantit të Ligës Arabe.
Në përfundim të samitit, kryediplomati egjiptian tha se plani arab parashikon rindërtimin në tre faza, ku e para do të jetë 6-mujore, kur do të bëhet edhe pastrimi i territorit nga rrënojat.
Gjatë kësaj periudhe, territori do të merret nën kontroll nga autoriteti palestineze që qeverisë edhe Bregun Perëndimor, ndërsa banorët do të zhvendosen brenda Rripit të Gazës.
Pak ditë më parë edhe Donald Trump publikoi një video të gjeneruar nga inteligjenca artificiale ku parashtrohej vizioni i tij për këtë territor me ndërtesa dhe shërbime luksoze. Vendet arabe kundërshtojnë shpërnguljen e palestinezëve./ Tv Klan
