Pengmarrja e Jan Prengës më 17 janar dhe më pas vrasja e tij, nxorën në skenë një nga grupet kriminale shqiptare të përfshira në trafikun e lëndëve narkotike. Grupi Hajri, me në krye Altin Hajrin janë të dyshuarit kryesorë sipas policisë për pengmarrjen dhe vrasjen e Prengës.
Gazetari Artan Hoxha ka hedhur dritë mbi të shkuarën e Altin Hajrit por dhe lidhjeve të tij me politikën. Në një video të publikuar sot nga gazetari, duket një ngjarje që daton në janar 2017 ku Altin Hajri arrestohet nga forcat e posaçme të Policisë së Durrësit pasi ndalohet me mjetin e tij luksoz në një lavash në zonën e Shijakut.
Lexo edhe: Hoxha publikon videon e arrestimit Altin Hajrit:U lirua me urdhër nga lart
Megjithatë, e shkuara e Hajrit tregon se ai ishte një nga eksponentët kriminal më të fuqishëm në trafikun e heroinës.
“Familja Hajri ka patur avantazh se nuk ka qenë i ekspozuar në ngjarje me pengmarrje, por ka histori të gjatë në trafikun e lëndëve narkotike. Është një nga emrat që italianët e kanë mbajtur në mbikqyrje. Altin Hajri është shpallur në kërkim, pasi janë kapur mbi 1 ton lëndë narkotike. Ky e merrte vetë në Afganistan dhe e shpërndante në Itali, por çuditërisht nuk u kap dhe u hoq kërkimi ndërkombëtar.” tha Hoxha.
Sipas tij ky grup shfaqet gjithashtu në përgjimet e dosjes ‘339’ ku hetohet përfshirja e personazheve të botës së krimit me politikën. Në këtë kohë ky grup ka qenë “në koalicion me një nga partitë që qeverisnin vendin”, thotë Hoxha.
Gazetari zbulon se arrestimi i Altin Hajrit në vitin 2017 u mbyll pas disa orësh si histori pasi persona me pushtet politik ndërhynë për të garantuar lirimin e tij
“Policia e Shtetit në atë kohë ka kërkuar të veprojë por ka patur pengesa, Adriatik Llalla ishte në atë kohë Prokuror i vendit. Para fushatës elektorale, Policia e Shtetit ka bërë një operacion, ka ndodhur një ngjarje më shkëmbin zjarri në Shijak, pas vëzhgimeve policia ka organizuar arrestimin e tij në mënyrë sekrete dhe e kanë prangosur. Vetëm disa orë më vonë është ndërhyrë dhe është kërkuar që ky person të lirohet, më vonë është shkarkuar drejtori i policisë”, tha Hoxha.
Mbrojtja politike dhe mos goditja e aktivitetit kriminal i ka dhënë këtyre grupeve guximin për të kryer edhe pengmarrjen e Jan Prengës në mes të Kamzës gjatë ditës dhe ta zhdukësh atë.
Sot policia ka arrestuar një tjetër person të dyshuar se ka lidhje me këtë ngjarje duke e çuar në 5 numrin e të arrestuarve, ndërsa janë shpallur në kërkim edhe 5 persona të tjerë.
Sipas policisë, 49-vjeçari ka mbetur i vdekur dhe kjo dëshmohet në kamerat e sigurisë së resortit dhe disa bizneseve ku shihet se të dyshuarit dalin me trupin e viktimës të mbështjellë me qese. Njëri prej tyre mban një lopatë në dorë, ndërsa trupi i viktimës futet në një furgon të bardhë.
Jan (Dod) Prenga dyshohet se është rrëmbyer pas vëllai i tij i burgosur në Britani është përfshirë në vjedhjen e një sasie kokaine nga një grup kriminal që është i lidhur me grupin Hajri.
Vëllai i 49-vjeçarit të rrëmbyer u ka kërkuar që mos flasin me policinë për këtë problem. Policia vijon ndërkohe kërkimet për trupin e viktimës, por të arrestuarit nuk kanë bashkëpunuar dhe kanë mohuar akuzat. /Opinion.al
