“Nuk na lejohet të flasim për gabimet e së shkuarës.” Kështu u shpreh Li Rui në vitin 2013 gjatë një reflektimi ku krahasonte liderin aktual të Kinës Xi Jinping me themeluesin e Kinës Komuniste, Mao Ce Dun.
Li Rui u nda nga jeta në Pekin ditën e shtunë, në moshën 101 vjeçare. Ai njihet si personi që kritikoi në të gjallë dy nga liderët më të fuqishëm në historinë e Kinës, shkruan BBC.
Në vitin 2013 Li Rui tha se Xi Jinping po punonte për shtypjen e mendimit politik dhe individual të Maos dhe po përpiqej të ndërtonte kultin e tij të individit.
Li Rui u bë anëtar i Partisë Komuniste kineze në vitin 1937 dhe luftoi për ardhjen në pushtet të komunistëve. Në vitin 1958 u zgjodh nga vetë Mao për të qenë sekretari i tij personal. Megjithatë, Li Rui u burgos pas kritikave që i bëri Maos në lidhje me dështimin e programit të modernizimit, që shkaktoi 30 deri në 60 milionë viktima si pasojë e torturave dhe urisë.
Pavarësisht historisë së tij të turbullt me partinë, fakti që Li Rui ishte një ndër revolucionarët e parë të Partisë Komuniste, zuri një vend në veçantë në historinë e Kinës moderne duke i dhënë edhe një shkallë të caktuar lirie për të folur mbi çështjet politike.
Megjithëse njerëzve nuk u lejohet të flasin për gabimet e së shkuarës, Li Rui mundi ta bënte këtë gjë dhe puna e tij ka ndihmuar shumë historianë për të zbuluar të vërtetat e regjimit të Maos.
