Koalicioni i Aleancës për Shqipërinë Europiane erdhi në qeveri pas zgjedhjeve të 2013-ës me një fitore plebishitare, por nga ajo kohë dhe deri sot, nuk kanë qenë të pakta largimet e ministrave.
Dorëheqja e Saimir Tahirit, sot 11 mars 2017, numërohet si lëvizja e tetë brenda kësaj qeverie, ku 4 kanë qenë tek ministrat e LSI dhe 4 nga PS.
Lëvizja e fundit para tij është shkarkimi i Ylli Manjanit nga posti i Ministrit të Drejtësisë dhe zëvendësimi i tij me Petrit Vasilin.
Më 11 Mars 2017, ikën Saimir Tahiri
Saimir Tahiri jep dorëheqjen nga posti i Ministrit të Brendshëm, tre muaj nga 18 qershori, dita kur presidenti thirri mbajtjen e zgjedhjeve parlamentare.Tahiri ka zhvilluar një takim me kryeministrin për t’i komunikuar vendimin e dorëheqjes së tij.
Burime të Opinion.al nga Kryeministria kanë bërë me dije se zv/kryeministri Niko Peleshi është emri që do të pasojë Tahirin në krye të Ministrisë së Brendshme.
Më 2 shtator 2016, ikën Edmond Haxhinasto
Ministri i Transporteve, Haxhinasto dha dorëheqjen nga detyra kryeministrit Edi Rama; “për shkak të angazhimit në parti”. Ai u zëvendësua nga Sokol Dervishaj, deri atë kohë shef kabineti pranë Kuvendit të Shqipërisë.
Më 16 Shkurt 2016, zëvendësime dhe rokadë emrash
Rama zëvendëson Shkëlqim Canin me Arben Ahmetajn në krye të ministrisë së Financave. Milva Ekonomi e emëron në krye të Ministrit të Ekonomisë, Turizmit, Tregtisë dhe Sipërmarrjes duke zëvendësuar Arben Ahmetajn.
Më 9 nëntor 2015, ikën Nasip Naço
Në orën 14:33 u bë publik lajmi i dorëheqjes së Nasip Naços si Ministër i Drejtësisë.
“Duke ju falënderuar për bashkëpunimin e deritanishëm, por duke qenë i bindur se Reforma në Drejtësi dhe përmbushja e një roli më thelbësor të Ministrisë së Drejtësisë në përmirësimin e mirëqeverisjes dhe funksionimit të drejtësisë kërkon një nivel më të lartë të bashkëpunimit dhe bashkëveprimit të të gjithë aktorëve, jap dorëheqjen time si Ministër i Drejtësisë.Duke shpresuar që në çdo rast ky akt të ndihmojë në krijimin e klimës së bashkëpunimit të kërkuar për reformimin e sistemit të drejtësisë”, tha Naço.
Në prill 2015, ikën Erion Veliaj vjen Klosi
Ikën Erion Veliaj për shkak se garoi për kreun e bashkisë Tiranë. Në krye të Ministrisë së Mirëqënies Sociale dhe Rinisë u vu Blendi Klosi.
1 gusht 2014, ikën Ilirian Celibashi
Ilirijan Celibashi detyroi kryeministrin Edi Rama të bëjë ndryshimin e parë të kabinetit pa mbushur ende një vit në qeverisje.
Ministri për marrëdhëniet me parlamentin në mënyrë krejt të papritur i dorëzoi dorëheqjen Ramës duke u largua edhe nga politika, pasi më herët la edhe mandatin e deputetit. Në pritje të dekretit të presidenti dhe votimin në parlament, kryeministri paralajmëroi si pasuese të Celibashit, Ermonela Felajn.
