Motra e Alda Canaj foli për herë të parë publikisht për tragjedinë në familjen e saj, 15 vite pasi u vranë motra dhe nëna e saj. Ornela Canaj reagoi e rebeluar ndaj intervistës së vrasësit Marjan Rroku në “E diela shqiptare”. Duke folur për Rudina Xhungen ajo tha se kishte denoncuar disa herë në polici dhe madje i kishin shkruar edhe shefit të SHISH, Fatos Klosit për dhunën dhe përndjekjen që i bënte Aldës, ish-punonjësi i SHISH Marjan Rroku. Sakaq sot në portalin Dritare.net publikohet letra drejtuar Klosit në shkurt 2001, një muaj para ngjarjes.
Letra
“Zoti Fatos!
Ne që po ju shkruajmë jemi dy prindër të tre vajzave nga Greshnica e Mallakastrës, të dy mësues. Unë Faslliu, drejtor shkolle, gruaja mësuese në Greshnicë. Vajzat i kemi të dyja në Tiranë, të madhen në Universitet viti i tretë gjermanisht, të mesmen viti i dytë italisht. Po ju shkruajmë juve, pasi një punonjës i juaji i SHISH-it, Marjan Rroku, vajzën e dytë, Alda Canaj, e ka rrahur, kërcënuar, i ka nxjerrë edhe pistoletën dhe i ka numëruar në sy plumbat, mbasi i ka thënë se do ta marrë në Itali.
Historia ka nisur në Maj 2000 kur ai i ka propozuar dhe vajza ishte 15 vjeçe. Vajza nuk ka pranuar. Në nëntor 2001 e ka kapur vajzën, e ka rrahur, kërcënuar dhe nëse ajo do të thoshte gjë në familje, apo motrës së madhe do të vriste motrën dhe shoqet e saj.
Vajzat kanë denoncuar në polici dhe polici Bim Hoxha (Ibrahim Hoxha), në fillim e ka marrë kërcënimin, pastaj ka mbajtur qëndrim zbutës. Vajzave u është bërë thirrje nga punonjësja juaj, Vera Halili, për të tërhequr denoncimin.”
Letra vazhdon me shpjegimin e situatës dhe thirrjen për ndihmë dhe mbyllet me fjalët:
“Besojmë se edhe si mallakastriot, diçka duhet të bëni për ne”.
Me respekt
Faslli e Mbarime Canaj
