Futbollisti i Kombëtares Ermir Lenjani ka sulmuar trajnerin Christian Panucci, duke theksuar se do të refuzojë çdo ftesë për të luajtur për ngjyrat kuq e zi për sa kohë në krye të bankinës të jetë italiani.
Në një postim në rrjetet sociale, Lenjani tha se që nga viti 2013 kur është bërë pjesë e Kombëtares, ka qenë gati gjithmonë, ka sakrifikuar shumë, është gjakosur, ka qarë e ka qeshur si futbollist i Shqipërisë. Ai shtoi se ka pranuar edhe stolin, por është respektuar gjithmonë derisa në stolin e Kombëtares erdhi Panucci. Duke i kujtuar se është vetëm një kalimtar, ai i tha Panuccit se dashuria e tij për Shqipërinë, është më e madhe se urrejtja e tij për të.
Statusi i plotë:
Që nga viti 2013 jam pjesë e Kombëtares shqiptare dhe ndihem krenar për këtë gjë. Saherë jam ftuar e kam pranuar ftesën me dëshirën më të madhe pasi çdo herë kur e kam veshur fanellën kuq e zi e kam veshur me shumë dashuri. Kam qenë gati gjithmonë, kam sakrifikuar shumë, jam gjakosur, kam qarë e kam qeshur si futbollist i Shqipërisë. Kam pranuar edhe stolin, por jam respektuar gjithmonë. Tani në dy vitet e fundit jam duke kaluar nëpër një formë shumë të mirë, por po injorohem nga trajneri momental i Kombëtares. Nuk kam luajtur asnjë minut në Ligën e Kombeve, por nuk kam bërë zhurmë dhe kam vazhduar të punoj edhe më fort. Kur lëndohen 4-5 lojtarë trajnerit i bie në mend që luan dikund Ermir Lenjani dhe më dërgon ftesë. Faleminderit, por JO. Me lot në sy e them se nuk do të grumbullohem më me Kombëtaren sa të jesh ti aty. Kam kontribuar shumë dhe meritoj respekt. Dashuria ime për Shqipërinë është më e madhe se urrejtja jote për mua. Unë kam qenë, jam dhe gjithmonë do të jem djal i Shqipërisë, ndërsa ti je vetëm kalimtar./Opinion.al
