Aktualitet

Largimi nga AKEP, Ilir Zela flet për presione. Socialistët mbrojnë…


               Publikuar në : 11:25 - 11/12/19 |
Geljano Fataj

Paketa anti-shpfije e qeverisë e cila ndodhet në Parlament për miratim ka nxitur një valë të re reagimesh kundërshtuese nga shoqatat e gazetarëve vendas dhe të huaja, si dhe institucionet ndërkombëtare në vend.

E riformuluar për të disatën herë nga shumica e majtë pas kritikave në vijimësi, ajo sërish i ka lënë të pakënaqura grupet e interesit, të cilat shohin me shqetësim fuqinë që marrin dy institucione administrative si AMA dhe AKEP në dëm të lirisë së medias online.

E për të rënduar edhe më shumë situatën, në “lojën e rrezikshme” ku është futur qeveria në media ka dalë dhe letra e dorëheqjes së drejtorit të një prej institucioneve, AKEP.

Ilir Zela i ka dërguar letrën e dorëheqjes kryetarit të Kuvendit Gramoz Ruçi, ku teksa e falënderon për besimin që institucioni i Kuvendit i ka dhënë që prej vitit 2017 kur mori drejtimin e AKEP, rrëfen edhe arsyet pse mori këtë vendim.

Në këtë letër që mban datën 2 tetor 2019, Zela shkruan se largimi nga detyra nuk lidhet me shkaqe personale, por lë të kuptojë se nuk ka lejuar të nëpërkëmbët nga presionet e interesave monopoliste.

“Me paqen e njeriut që i ka shërbyer publikut me përkushtim shembullor, në këtë detyrë apo në angazhime publike të mëhershme, pa lejuar në asnjë moment që interesat publike te nëpërkëmben nga presioni i pandërprerë i interesave monopoliste, ju njoftoj dorëheqjen time nga detyra e Kryetarit te Këshillit Drejtues te AKEP.”-shkruan Zela.

Por deputetët e mazhorancës vazhdojnë symbyllurazi të mbrojnë projektligjet e qeverisë si të konsultuara ndërkombëtarisht. Ata i thurën lavde qëllimit për të luftuar dizinformimin dhe lajmet e rreme –për të cilat spekuluan sërish se legjislacione të ngjashme po prezantohen tashmë gjithandej nëpër Europë dhe Shtetet e Bashkuara./ Opinion.al

Pas