Deputetja e PD-së, Jorida Tabaku ka reaguar për ndarjen e parakohshme nga jeta të ish-deputetit demokrat, Gerti Bogdani.
Përmes një reagimi në rrjete sociale, Tabaku shkruan se kjo tragjedi i ka tronditur thellë, duke i lënë të pikëlluar për pamundësinë e një takimi të fundit me Gertin.
Ajo thotë mes të tjerash se dhimbja më e madhe u takon prindërve të tij të dashur, të cilët po përballen me humbjen e pakrahasueshme të birit të tyre të shtrenjtë.
“Lamtumirë mikut tonë të dashur, Bogut!
Trishtimi që ndjejmë sot, teksa i japim lamtumirën mikut, kolegut dhe një qytetari të shquar të këtij vendi, është i pamasë. Kjo tragjedi na ka tronditur thellë, duke na lënë të pikëlluar për pamundësinë e një takimi të fundit me të, për mungesën e një fjale të fundit, për heshtjen që do të mbulojë bisedat tona sa herë që emri i tij të përmendet, pa na ardhur përgjigje. Këto janë pengje të një jete që mbaron shpejt, pa na kërkuar leje.
Dhimbja më e madhe u takon prindërve të tij të dashur, Isufit dhe Ildës, të cilët po përballen me humbjen e pakrahasueshme të birit të tyre të shtrenjtë. Nuk ka fjalë që mund të lehtësojnë dhimbjen e tyre, por le të jenë krenarë për njeriun e mrekullueshëm që rritën. Kujtimi i tij do të ndriçojë gjithmonë zemrat e Eslires, Rajnes dhe Reinardit, të cilët kanë humbur një bashkëshort të përkushtuar dhe një baba të dashur. Trashëgimia që ai ka lënë pas do të jetojë përmes tyre.
Ndërkohë, shumë prej nesh janë rizgjuar nga kjo humbje, duke kuptuar pafuqinë tonë përballë kohës dhe fatit. Ne dorëzohemi përpara pamundësisë për të ndryshuar atë fraksion të sekondës që na ndan nga kjo botë në tjetrën, duke zbehur çdo pushtet dhe çdo arritje që kemi ndërtuar me duart dhe mendjet tona.
Dhe ndërsa Gerti nis rrugëtimin e tij drejt Zotit dhe botës tjetër, secili prej nesh ngre sytë drejt vetes për të reflektuar mbi shkurtësinë e jetës dhe se si Zoti e ka ndërtuar këtë botë që ta shijojmë përkohësisht, pa u kapur pas saj. Sepse në atë botë tjetër, nuk do të kemi me vete as pushtetin, as pasurinë, as miqësitë, as statusin social, por do të na shoqërojnë vetëm besimi, veprat dhe puna jonë. Është koha të kuptojmë kufijtë tanë dhe përkohshmërinë tonë!
“Çdo shpirt do ta shijojë vdekjen.” (Kurani, 3:185)
U prehsh në paqe, Gert!“, shkruan Tabaku.
