(Foto ilustruese)
Një protestë e pazakontë do të zhvillohet sot pasdite në Shkodër.
Qytetarët shkodranë, së bashku me drejtuesit lokalë të bashkisë do të marrin pjesë në orën 19.00 në një marrshim proteste kundër krimit, që po terrorizon qytetin.
Ndryshe nga çdo protestë tjetër, do të jenë të pranishëm edhe përfaqësuesit e komuniteteve fetare.
Arqipeshkvi i Shkodrës, imzot Angelo Massafra dhe hoxha i xhamisë së Rusit, Fejzi Zaganjori mbeshtesin protestën e shkodranëve kundër krimit pa ndëshkim.
Plumbat që po marrin jetë në Shkoder, i kanë shqetësuar jo pak qytetarët e këtij qyteti, që deri dje krenohej si “Shkodra e artit dhe kulturës”.
Në 3 muajt e fundit në Shkodër janë vrarë 6 persona nga atentate të tipit mafioz, ndërsa 3 të tjerë rezultojnë të zhdukur. Bilanc më të rëndë në këto vitet e fundit nuk kishte patur në këtë qark, që tashmë është kthyer në një Palermo të vogël, ku krimi i organizuar ka sjellë pasiguri.
Qetësia është prishur dhe ekzekutimet pa autor, janë një këmbanë alarmi, për sa kohë që policia nuk po arrin t’i zbardh këto ngjarje.
Mbrëmjeve policia vijon patrullimet në zona të ndryshme të qytetit, por pas tyre lind një ditë e re pa shumë ndryshime, e vetëm me shpresën që të tilla ngjarje të mos përsëriten, duke shtuar bilancin e viktimave./Opinion.al
