Lajm i hidhur për Bajernin

Bajern Mynih humb një element shumë të rëndësishëm për dy ndeshjet e Ligës së Kampioneve ndaj Real Madrid. Klubi gjerman ka bërë zyrtar lajmin se mesfushori Arturo Vidal ka mbyllur sezonin pasi duhet të operohet për shkak të një problemi që ishte më i rëndë sesa mendohej fillimisht.
Lojtari dëmtoi gjurin e tij të majtë në stërvitjen e së dielës, por Bajerni shpresonte që ta kishte gati për një nga duelet ndaj Real Madrid në Ligën e Kampioneve. Futbollisti udhëtoi drejt Augsburgut, ku takoi një nga kirurgët më të njohur dhe pas ekzaminimeve, u zbulua se kishte një dëmtim edhe në meniskun e jashtëm të gjurit, që bënte të nevojshëm operimin.
Bajerni njoftoi nëpërmjet rrjeteve sociale se kjo nënkuptonte që Vidal kishte mbyllur sezonin, duke bërë të qartë se mesfushori kilian nuk do të kthehej dot në fushën e lojës as nëse bavarezët arrinin në finalen e Ligës së Kampioneve.