Një nga dy kushërinjtë e vrarë mbrëmë në qytetin e Laçit, ka qenë futbollist i Kategorisë Superiore dhe Kategorisë së Parë. Ai është Kelvin Jushi, i cili prej disa kohësh mbante emrin Jani Jushi.
Duke iu referuar të dhënave të faqes zyrtare të Federatës Shqiptare të Futbollit, Jushi ka luajtur me ekipet e Laçit, Kastriotit dhe Adriatikut të Mamurrasit. Ai ka lindur më 18 prill 1989 në Laç dhe prej pak ditësh kishte mbushur 30 vjeç.
Nga hetimet paraprake dyshohet se konflikti mes viktimave dhe autorëve ka nisur brenda një lokali, për shkaqe që ende nuk dihen. Pas konfliktit dy viktimat janë përpjekur që të largohen, sepse kanë parë që një prej personave me të cilët janë konfliktuar, ka nxjerrë armën.
Autori i ka ndjekur nga pas dhe pavarësisht se janë përpjekur që të fshihen në një rrugicë, nuk kanë arritur t’u shpëtojnë plumbave të pistoletës. 35-vjeçari Mikel Jushi mësohet se është pronar i një lokali në qendër të Laçit, teksa mbrëmë ka qenë me djalin e xhaxhait të tij Jani (Kelvin) Jushi./Opinion.al
