Prokurorja e Përgjithshme e Përkohshme Arta Marku ka dorëzuar zyrtarisht kandidaturën në KLP për t’u rikonfirmuar në këtë detyrë.
Arta Marku e mban këtë post prej dhjetorit të vitit 2017, ku u zgjodh vetëm me votat e mazhorancës në Parlament. Ajo tashmë është e katërta që dorëzon kandidaturën, pasi javën e kaluar kanë kërkuar të hyjnë në garë edhe prokurorët Olsian Çela, Fatjona Memçaj dhe Lulzim Alushaj.
Edhe pse Këshilli i Lartë i Prokurorisë i cili pret aplikimet e kandidatëve për garë, nuk pranoi se ky fakt ka ndodhur zyrtarisht, nga zyra e shtypit pranë prokurores Marku, mësohet se aplikimi në rastin e saj është bërë me postë.
Edhe pse Këshilli i Lartë i prokurorëve ushtron detyrën pranë ambienteve të institucionit që drejton Arta Marku që prej dhjetorit të 2017, kjo e fundit e ka kryer aplikimin me një shërbim publik dhe jo me dorëzimin e dosjes me aplikim brenda zyrave të prokurorisë.
Sipas rregullores së miratuar nga Këshilli i Lartë i Prokurorisë, një prokuror, që të kandidojë për të qenë në krye të Prokurorisë së Përgjithshme, duhet që të ketë 15 vjet përvojë pune si jurist i spikatur.
Të jetë diplomuar në Shkollën e Magjistraturës ose të ketë gradë shkencore në drejtësi, të mos ketë mbajtur gjatë 10 viteve të fundit, para dorëzimit të shprehjes së interesit për Prokuror të Përgjithshëm, funksione politike në administratën publike, të mos ketë mbajtur gjatë 10 viteve të fundit pozicione drejtuese në partitë politike si edhe të mos ketë qenë anëtar, bashkëpunëtor ose i favorizuar i ish-Sigurimit të Shtetit./Opinion.al
