Kuvendi ka mbyllur mbrëmjen e së enjtes sesioni e shtatë të punimeve për këtë legjislaturë me miratimin e amnistisë për të burgosurit. Amnistia kaloi me 84 vota pro bashkë me votën e Tom Doshit, Armando Prengës dhe Mhill Fufi, duke i hapur rrugën lirimit të 670 të dënuarve për vepra të lehta penale.
Gjithashtu, Kuvendi miratoi dhe disa ligje të tjera, ku mes tyre veçohen ato për sektorin bankar. Ndryshimet në ligjin “Për bankat” u kaluan me 79 vota, ai “Për sigurimin e depozitave” u miratua me 78 vota, ndërsa ligji tjetër i rëndësishëm “Për rimëkëmbjen dhe ndërhyrjen e jashtëzakonshme në banka” u miratua me 79 vota.
Deputetët miratuan gjithashtu me 79 vota ndryshimet në ligjin “Për gjendjen civile”, ndërsa ligji “Për sigurinë dhe shëndetin në punë” kaloi me 78 vota.
Ratifikimi i marrëveshjes me SHBA-në, “për kontrollin e lëndëve narkotike dhe zbatimin e ligjit” mori edhe votat e opozitës, 93 gjithsej, ndërsa ndryshimet në ligjin “Për lojërat e fatit” u miratuan me 72 vota.
Në fund Kuvendi vendosi dhe mbylljen e veprimtarisë 2-vjeçare të Komisionit të Posaçëm të Reformës në sistemin e drejtësisë. I ngritur me një vendim të Kuvendit më 27 nëntor 2014, komisioni rezulton se e ka përmbushur funksionin e tij me miratimin e ndryshimeve kushtetuese në muajin korrik dhe më pas me miratimin e 7 ligjeve në muajin tetor, pjesë e paketës mbështetëse për zbatimin e reformës në drejtësi.
