Në mënyrë të paprecedent, që s’ka ndodhur asnjëherë më parë, dy cerdhe fëmijësh u përfshinë nga flakët në Tiranë brenda 5 ditës. Konkretisht më 16 gusht për shkak të rrjedhjes së gazit u dogj një magazinë në cerdhen e Ali Demit, dhe më 21 Gusht ra zjarr në katin e dytë të e çerdhes në zonën e Bllokut.
Partia Demokratike ka reaguar ashpër për këto episode që shqetësojnë shumë komunitetin në Tiranë, për sigurinë e fëmijëve të tyre. Zëdhënësja e PD, Ina Zhupa tha sot se kryebashkiaku Erion Veliaj, nuk duhet të fshihet pas lajmeve të rreme për “zjarrvënie të qëllimshme” por duhet të mbajë përgjegjësi për sigurinë në institucionet ku rriten fëmijët e kryeqytetit.
Deklarata e plotë e PD për kryetarin e bashkisë, policinë dhe prokurorinë:
Në Tiranë mbrëmë një tjetër çerdhe, në mes të bllokut, u përfshi nga flakët. Fati deshi që të mos kishte fëmijë dhe punonjës të lënduar. Për fat, edhe shpërthimi i tmerrshëm i pak ditëve më parë ndodhi, kur në çerdhen 14 nuk kishte fëmijë apo kujdestarë. Çerdhet, kopshtet, shkollat ne Tiranë nuk duhet të jenë në dorë të fatit, por të kenë standarte që garantojne sigurinë e fëmijëve.
3 vjet më parë, Erion Veliaj, doli 31 ditë rresht në ekrane, duke inauguruar te ashtuquajturin rikonstruksion falas të 31 çerdheve të Tiranës. Por përveç propagandës me ngjyra, Erion Veliaj nuk përmendi asnjëherë masat e marra për sigurinë në kopshte dhe çerdhe, për të cilat bashkia që ai drejton është përgjegjese direkte.
Qytetarët duan të dijnë pse nuk reagon Erion Veliaj për dy rastet skandaloze të rënies së zjarrit në çerdhet e Tiranës, por vazhdon me propagandën bajate, sikur të mos ketë ndodhur asgjë.
Në vend që të japë llogari për shqetësimin e prindërve dhe në vend që të nisë me urgjencë kontrollin e sigurisë dhe të standardeve në çerdhe dhe kopshte, Erion Veliaj fshihet pas përhapjes së lajmeve për zjarrvënie të qëllimshme.
Nëse është kështu, Policia duhet të sqarojë urgjentisht këtë situatë, e cila, po të verifikohet si e vërtetë, përbën një akt terrorist, që duhet të kishte ngritur shtetin në këmbë. Por, nëse rezulton se Veliaj po përpiqet të viktimizohet, ai dhe kushdo tjetër duhet të merret në përgjegjësi penale për pengimin e drejtësisë për përhapjen e lajmeve të rreme.
Partia Demokratike kërkon që të nisë me urgjencë kontrolli për sigurinë dhe standartet në të gjitha çerdhet, kopshtet dhe shkollat publike dhe private.
Qytetarët presin që, të paktën në rastin e sigurisë së fëmijëve, prokuroria të mos veprojë si një shërbëtore e verbër e pushtetit, kryebashkiakut dhe mafias së ndërtimit në Tiranë.
Fëmijët në Tiranës nuk janë të sigurt me një kryebashkiak që i përdor për fasadë. Erion Veliaj nuk është kryebashkiaku që meritojmë.
*Foto ilustruese, Veliaj para dy vitesh, duke inauguruar cerdhen qe u dogj ne Bllok
