Ata erdhen si turistë në Viktoria të Australisë në vitin 2012, por pa patur një punë të ligjshme, autoritetet ngriten pikëpyetje për pasurinë e tyre në llogaritë bankare.
Tre shtetasit shqiptar, Simon Shehu, 40 – vjeç Gjergji Nika, 43 – vjeç dhe Marsel Boka 33 – vjeç me lidhje familjare mes tyre dhe shtetasi italian, Aniello Vinciguerra që iu bashkua në 2014, kanë grabitur kasaforta dhe bankomate nga Melburni, deri në Kuinsland.
Shifra e përvetësuar prej tyre llogaritet në rreth 600 mijë dollarë.
Sot janë prapa hekurave dhe kundër tyre rëndojnë 82 akuza. Sa i takon shtetasit me pasaportë italiane, 35 – vjeçarit Vinciguerra dyshohet se dokumenti është i falsifikuar.
Shqiptarët, bashkë me familjet e tyre kishin mbërritur në Australi me vizë turistike në Tullamarine, Viktoria në vitin 2012 dhe ishin vendosur në tre shtëpi. Policia nuk ka përcaktuar ende rolin specifik të secilit në grabitjet t e kryera, por sipas hetuesve ata janë pjesë e një aktiviteti të përbashkët kriminal.
Shtetasi italian ka deklaruar se do të kundërshtojë akuzat dhe pritet të gjykohet në fund të këtij viti, ndërsa shtetasit shqiptarë nuk kanë dalë ende përpara gjykatës. /Tv Klan/
