Është hedhur shorti në Gjykatën e Posaçme të Apelit, për të përcaktuar trupën gjykuese që do të japë vendimin për gjyqtaren, Enkeleida Hoxha dhe personat e tjerë të arrestuar, pjesë e skemës të korrupsionit në Gjykatën e Krujës.
Sipas News 24, trupa e gjyqtarëve do të kryesohet nga Nertina Kosova, Dhimitër Lara dhe Sokol Binaj. Ato do të gjykojnë ankimimin në Apel të gjyqtares, mjekut Edvin Priftit dhe 11 të tjerëve. Seanca do të mbahet në datën 2 mars 2021, ora 11:00.
Prokuroria e Posaçme kundër Krimit të Organizuar dhe Korrupsionit zbuloi një skemë e mirëfilltë kriminale sipas së cilës persona të dënuar, të cilët vuanin dënimin në burgun e Fushë -Krujës përfitonin ulje dënimi nga gjyqtarja Enkeleida Hoxha kundrejt dhënies së parave.
Të dënuarit fillimisht zgjidhnin si avokat mbrojtës Aldo Tabakun dhe ky i fundit falë marrëdhënies që kishte krijuar me gjyqtaren Enkeleida Hoxha, mundësonte që të dënuarit të përfitonin uljen e dënimit, kundrejt shumave të parave që shkonin nga 6 deri 12 000 euro. Në këtë skemë ishte përfshirë dhe sekretarja gjyqësore Emanuela Mallkuçi, e cila kundrejt marrjes së parave ka siguruar që kërkesa e të dënuarit të kalonte për shqyrtim tek gjyqtarja Enkeleida Hoxha
Ndërkohë që Inspektorati i Lartë i Drejtësisë më herët ka bërë kërkesë për shkarkimin e gjyqtares Enkelejda Hoxha, pasi emri i saj lidhet me lirimin e shumë të dënuarve me burg përjetë, mes tyre edhe Endrit Dokle, Genc Tafilit, apo Hekuran Billa, i vrarë pak muaj më parë në Tiranë./Opinion.al
