Dikush foli për operacionin e policisë të koduar “KUITO”, ku u zbulua një sasi prej 137 kg kokainë me vlerë dhjetëra milionë euro, që vinte nga Ekuadori në drejtim të Durrësit.
Policia e Shtetit nuk e pranon që operacioni u dekonspirua, ndërsa flet për një sukses. Sipas shtypit të përditshëm, lënda narkotike i përkiste dy grupeve kriminale: Në Elbasan dhe në Fier.
Një nga anëtarët e grupit të Elbasanit, me origjinë nga ky qytet dhe që jeton në Pire të Athinës, dyshohet se ka qenë njeriu që ka dhënë informacionin për sekuestrimin e kokainës dhe futjen në lojë të DEA-s Amerikane.
Sipas kompanive që monitorojnë lëvizjen e mallrave për qëllime tregtare me anë të kontenierëve, ngarkesa me destinacion Shqipërinë është nisur nga porti i Guajakil më 24 korrik. Pas më shumë se 3 javësh në rrugë detare, kontenierët kanë mbërritur në Pire më 19 gusht.
Gjatë kontrollit nga autoritetet greke me mbështetjen edhe të agjentëve të DEA-s amerikanë është arritur në përfundimin se në këto kontenier kishte kokainë me destinacion Durrësin Sasia e drogës ishte e ndarë në tre kontinierë dhe në total ishte 137 kg, por pjesa me e madhe e tyre kanë qenë pako me oriz.
Në këtë operacion të koordinuar nga DEA Amerikane, policia ka vënë në pranga dy persona, Ardian Bego me detyrë punonjës sigurie në Portin e Durrësit si dhe Altin Myslihaka, peshkatar, për të cilët gjykata e krimeve të rënda ditën e premte, dha masën e arrestit me burg.
Ndërkaq është shpallur në kërkim Gentian Malindi, djali i avokatit Ilir Malindi, personi i cili ka qenë duke pritur me një makinë ngjyrë gri me targa të huaja, Begon dhe Myslihakën, që të merrnin pakot me kokainë.
Bego, Myslihaka dhe Malindi, më pas kanë dal nga Porti i Durrësit duke shfrytëzuar rrugën dytësore nga Plepat në drejtim të Shkëmbit të Kavajës. Aty ka qenë pikërisht momenti kur ata kanë kuptuar se diçka nuk shkonte me sasinë e drogës që kishin marrë./ Opinion.al
