Gulnara Karimova, vajza e ish-diktatorit të Uzbekistanit, Islam Karimov, po ndiqet penalisht nga autoritetet zvicerane si koka e një organizate kriminale ndërkombëtare.
Karimova, e njohur edhe me pseudonimin “Princesha e Uzbekistanit”, akuzohet se drejtoi operacionin që dyshohet se kanalizoi ryshfet në vlerë prej qindra miliona dollarësh nga kompanitë e telekomit.
Paratë u derdhën përmes llogarive bankare në disa vende përpara se të transferoheshin në llogaritë në Zvicër, tha Zyra e Prokurorit të Përgjithshëm (OAG).
U përfshinë shuma të mëdha, me më shumë se 340 milionë franga zvicerane (370 milionë dollarë) të konfiskuara tashmë me synimin për t’u kthyer në Uzbekistan.
Më shumë se 440 milionë franga asete mbeten të sekuestruara në procedurën kundër Karimova dhe një tjetër të akuzuari, një ish-drejtor i përgjithshëm i degës uzbeke të një kompanie ruse të telekomit, që nuk përmendet në aktakuzë.
Karimova dikur ishte një biznesmene e suksesshme dhe përfaqësuese e vendit të saj në Kombet e Bashkuara në Gjenevë.
Ajo aktualisht ndodhet në burg në Uzbekistan, pasi u burgos në vitin 2019 për shkelje të kushteve të arrestit shtëpiak pasi mori një dënim pesë-vjeçar në vitin 2015 me akuzat për përvetësim dhe zhvatje.
Aktakuza thoshte se kompanitë e huaja që dëshironin të vepronin në sektorin e telekomunikacionit të Uzbekistanit duhej të korruptonin Karimovën, e cila “shfrytëzoi statusin e saj të dyfishtë si vajza e presidentit dhe si zyrtare “, duke i dhënë asaj ndikim të pakufizuar.
Rasti është dorëzuar në Gjykatën Penale Federale të Zvicrës./Opinion.al
