Gjyqtarit të Apelit Shkëlqim Miri me urdhër të Prokurorisë së Krimeve të Rënda iu kontrollua banesa në mesnatë. Eshtë ekzekutuar pas mesnate urdhëri i ndalimit. Prokuroria për Krimet e Rënda po e heton gjyqtarin për korrupsion pasiv.
Burimet thanë se prokuroria ka disa muaj që po heton për dyshimet për korrupsion rreth gjyqtarit. Sipas grupit të hetimit, gjyqtari i Apelit dyshohet të ketë marrë 20 mijë euro për të ndryshuar kualifikimin e një vrasjeje të ndodhur në Burrel, në vitin 1997.
Sipas po të njëjtave burime gjyqtari i ka ndryshuar akuzën nga vrasje, në plagosje të rëndë me dashje shtetasit Gentian Doda, i ekstraduar në 2012 nga Shtetet e Bashkuara të Amerikës.
Doda akuzohet për vrasjen e dyfishtë të Gazmir Dedjes dhe Asllan Gjokës. Gentjan Doda dhe Gazmir Dedja mësohet se kanë qenë pjesë e grupeve rivale në Burrel, ndërsa Asllan Gjoka u vra aksidentalisht.
Çështja e Dodës u shqyrtua edhe në Gjykatën Kushtetuese, e cila vendosi që gjykimi ndaj tij të zhvillohej sërish në Gjykatën e Shkallës së Parë të Matit. Prokuroria e Matit kishtë kërkuar dënimin e tij me 20 vjet burg me akuzën e vrasjes me paramendim, por gjyqtari Miri dyshohet se i kishte ndryshuar kualifikimin e vepres penale ndaj Dodës duke e kthyer në plagosje të rëndë me dashje. Prokuroria e Përgjithshme sot do të njoftojë KLD-në për të proceduar më tej ndaj gjyqtarit Shkëlqim Miri.
Shkëlqim Miri prej vitit 2010 është gjyqtar në Gjykatën e Apelit të Tiranës. Ai ka qenë anëtar i KLD-së deri në vitin 2012. /Opinion.al
