Një 39 vjeçar u plagos pasditen e djeshme në Korçë. Mina Zoja jetonte në Gjermani dhe sapo ishte kthyer për festa. Aiu u paraqit me plagë në spital dhe mjekët lajmëruan policinë. Zoja, thanë burimet ishte konfliktuar me disa persona emrat e të cilëve nuk ka pranuar ti tregojë në polici.
Personat, me të cilët u konfliktua, fillimisht e kanë goditur dhe janë larguar me shpejtësi, por më pas janë rikthyer dhe e kanë qëlluar me pistoletë, ku ka marrë një plumb në këmbë.
Nga të dhënat e para si edhe deklarimet e marra nga i plagosuri, dyshohet se ngjarja ka ndodhur në hyrje të Korçës, përgjatë aksit rrugor Korçë-Ersekë. Forca të shumta të Policisë shkuan në vendin e ngjarjes si dhe ngritën postblloqe në akset kryesore për ndalimin e autorëve. Deri tani, Policia ka bërë shoqërimin e disa personave të dyshuar si autorë të kësaj ngjarjeje.
Vetë 39- vjeçari, gjatë marrjes në pyetje nga oficerët e policisë, është treguar i rezervuar duke mos dhënë shumë informacion mbi ngjarjen. Mina Zoja rezulton person me precedentë të mëparshëm pasi rezulton i dënuar për shitje dhe prodhim të lendeve narkotike.
39- vjeçari ka qenë i dënuar në Gjermani dhe Shqipëri. Nga hetimet paraprake dyshohet se plagosja ka ardhur pas prishjes së pazareve të drogës dhe kjo mendohet të jetë arsyeja pse 39-vjeçari nuk ka pranuar të japë asnjë detaj para grupit hetimor.
