Kryeministri i Kosovës, Albin Kurti në një konferencë me titull “Të bashkuar kundër dhunës – Mjaft!”, këtë të martë ka folur për rastin e vrasjes së Liridona Ademajt dhe rrëmbimin e më pas vrasjen e një vajze të mitur 14-vjeçare ne Shkup.
Kurti ka thënë se vrasja e porositur e Liridona Ademajt nga burri i saj dhe rrëmbimi i 14-vjeçares në Shkup kanë renduar mendjet dhe zemrat e të gjithëve.
Më tej ai ka theksuar se porositësit dhe autorët që ekzekutuan Liridonën ndodhen pas hekurave, por thotë se vetëm arrestimi nuk mjafton.
Kurti ka nënvizuar se Gjykatat duhet t’i trajtojnë me prioritet rastet e dhunës ndaj grave dhe vajzave dhe se autorët duhet të marrin dënimin që meritojnë.
“Vrasjet e fundit, vrasja e porositur e Liridona Ademajt nga burri i saj dhe kidnapimi dhe vrasja e 14-vjeçare ne Shkup, na ka rënduar mendjet dhe zemrat tona. Porositësit dhe kryerësit e rastit të Liridonës janë zënë e janë vënë prapa grilave. Policia syçelë si kurrë njëherë po vepron shpejt e me efikasitet të lartë. Por s’po mjafton vetëm arrestimi. Sepse ata po e dinë që ka raste të të ngjashme e jo të pakta, kur kriminelët lirohen e veprat po përsëriten edhe më rëndë se herën e parë. Kemi nevoje që krejt sistemi i Drejtësisë t’i bëjë prioritet rasteve të dhunës ndaj vajzave dhe grave. Nuk kemi si ta themi që duhet dënim meritor. Butësia e dënimit po shkakton përsëritjen e krimit. Vënia e drejtësisë është kusht i domosdoshëm për një shoqëri të lirë e demokratike e çfarë aspirojmë të mbesim përherë”-tha Kurti.
