Kreu i Lëvizjes Vetëvendosje, Albin Kurti është shprehur se janë pranë një marrëveshjeje me LDK-në.
Në një deklaratë për Klan Kosova, Kurti tha se dy partitë janë afër një marrëveshjeje dhe se është duke pritur që LDK-ja të shprehet mbi propozimin e tyre.
”E kam thënë edhe më herët se jemi afër marrëveshjes – jemi aq afër sa që po u afruam edhe më, merremi vesh mirëpo nuk ka takime që 8 ditë ndërkohë që unë jam përditë në Kosovë dhe jam i gatshëm dhe i interesuar. Të enjten e 9 janarit na është thënë ”do të pyetet Këshilli i LDK-së për propozimin tonë”, tha Kurti.
I pyetur se kur do të dorëzojnë emrin e të mandatarit për themelimin e qeverisë tek Presidenti Thaçi, Kurti tha se do ta bëjë këtë sapo të ndodhë marrëveshja.
”Ne do ta dërgojmë propozimin tonë tek presidenti, por po përpiqemi maksimalisht që kjo të ndodhë, pas marrëveshjes që do ta arrijmë me LDK-në. Nga takimi më 6 janar të hënën bëhen 2 javë, dhe po përpiqemi që një propozim i tillë të shkojë në presidencë bashkë me marrëveshjen. Dëshiroj që Qeveria jonë të jetë qeveri e shumicës ku bënë pjesë VV e LDK. Populli ka pasur të drejtë më 6 tetor dhe Kosovën e presin ditë mira në vijim. Ne jemi për marrëveshje e cila do ta bëjë Qeverinë e re të paparë në Kosovën e pasluftës”, shtoi ai. /Opinion.al
