Kreu i Lëvizjes Vetëvendosje Albin Kurti ka bërë thirrje përmes një video mesazhi të postuar në Facebook për tu ulur sërish në tavolinën e bisedimeve me LDK-në.
Ai ka deklaruar se nuk e ka pranuar propozimin e LDK-së por nënvizon se nga ana tjetër ata nuk pranuan propozimin e fundit të VV-së madje pa e trajtuar fare në Këshillin e tyre të Përgjithshëm siç ishte parashikuar.
“Qëndrimi se takohemi vetëm për ceremoninë e nënshkrimit të marrëveshjes, pra, qasja ‘Merre ose lëre’, do të thotë lëre. Unë besoj se ne mund të kthehemi dhe e kemi detyrim ndaj të gjithë jush që të kthehemi në tavolinën e bisedimeve, për të mos dalë nga ajo deri në gjetjen e një gjuhe të përbashkët dhe arritjen e marrëveshjes sonë”, tha ai.
Kurti nuk la pa përmendur se kryetar i ri i Kuvendit është Glauk Konjufca duke mbyllur hapësirat për një ndryshim të mundshëm në këtë pozicion siç kërkoi LDK-ja në propozimin e saj të fundit.
“Jemi të gatshëm për takime tjera”, tha Kurti teksa konfirmoi edhe dërgimin e propozimit për mandatin e kryeministrit të Kosovës, tek presidenti Hashim Thaçi.
Pak më herët u bë e ditur se ky i fundit e ka ftuar Kurtin në një takim në orën 12:00 për t’i dorëzuar dekretin presidencial të mandatit të kryeministrit. /Opinion.al
