Një 27-vjeçar shqiptar është kapur nga forcat e policisë së Kurbinit, në operacionin e koduar “Adriatiku”, për llogari të drejtësisë belge. Operacioni është zhvilluar nga Komisariati i Policisë Kurbin në bashkëpunim me Task Forcën “Anti Skifter” pranë Policisë së Shtetit.
Ky operacion vjen në vazhdën e zhvillimeve policore me bashkëpunim ndërkombëtar, si pjesë e operacionit të koduar “Pikaso”, për goditjen e një grupi kriminal në fushën e vjedhjeve të banesave dhe të pronave në Belgjikë, rezultat i të cilit janë 8 të arrestuar, 3 prej të cilëve në Shqipëri.
27-vjeçari me iniciale E.K., banues në Kurbin, rezulton me masë sigurie “arrest me burg” nga Gjykata për Krimet e Rënda në Tiranë, me një vendim të datës 25 prill të këtij viti, për veprat penale të “vjedhjes më shumë se një herë”, “grup i strukturuar kriminal” dhe “kryerja e veprave kriminale nga një grup i strukturuar kriminal”./Opinion.al
