FIFA mori zyrtarisht kandidaturat për zhvillimin e Botërorit 2030 dhe edicionit të vitit 2034, gjatë një eventi të zhvilluar në Paris. Kreu i Konfederatës Botërore të futbollit, Xhani Infantino, dhe Sekretari i Përgjithshëm, Matias Grafstrom, morën në dorëzim dokumentacionin nga vendet organizatore.
Kupa e Botës 2030 do të zhvillohet në bashkëpunim mes Spanjës, Portugalisë dhe Marokut, por duke qenë edhe 100-vjetori i turneut, ndeshjet e para do të luhen në Uruguaj, Argjentinë dhe Paraguaj.
Për Botërorin e vitit 2034, kandidatura në garë është ajo e Arabisë Saudite. Dokumentet zyrtare u dorëzuan nga Presidenti i Federatës, ministri i Sporteve dhe kreu i Komitetit Organizator të vendit arab.
“Kupa e Botës i përket të gjithë botës. Të gjithë kanë të drejtë të kualifikohen, të luajnë apo ta organizojnë. Është e rëndësishme që ky event të shkojë në çdo cep të globit, në mënyrë që të bashkojë njerëzit. Për ne është e rëndësishme që procesi të jetë transparent. Botërori 2030 dhe edicioni i vitit 2034 do të zhvillohen në katër kontinente, për një total prej shtatë shtetesh të ndryshme. E kemi të qartë që do të jenë festa të jashtëzakonshme”, tha Infantino.
Afati përfundimtar për dorëzimin e dokumentacionit ishte data 31 korrik. Kandidaturat do të shqyrtohen dhe miratohen në Kongresin e Jashtëzakonshëm të FIFA-s, që do të zhvillohet në muajt në vazhdim.
