Kryeministri Edi Rama ka deklaruar se ditën e nesërme caktohet në qeveri Konsultimi i madh Kombëtar me shqiptarët për vendime të rëndësishme të vitit të ardhshëm.
Nëpërmjet një postimi në rrjetet sociale, Rama ka thumbuar dhe ish-kryeministrin Sali Berishën i cili organizoi protestë kundër presidentit Aleksandër Vuçiç.
Po ashtu, Rama ka komentuar dhe për debatin brenda PD, teksa cilëson Bashën e Berishën “kufomë non grata” dhe Bashën dordolecë.
Reagimi i Ramës
S’kam ndërmend të merrem as me kufomat gratanongrata as me dordolecët e papagallët grata e vinci (gërvisht e fito) që kanë hyrë në një vorbull marrëzie qesharake bravash, dyersh, kanalesh e portalesh, kinse po duan kush e kush të luftojë më fort regjimin, korrupsionin, vuqiqin! Jam i inkurajuar që drejtësia e re po jep sinjale të qarta pa dallim ngjyrash, ekonomia po vijon ringjitjen pas pandemisë, sporteleve po u vjen fundi bashkë me vitin në ikje dhe më e mira është e gjitha përpara, duan s’duan humbësit fitimtarë të kuvendeve demokratike e mediatike! Nesër vendosim në qeveri Konsultimin e madh Kombëtar me shqiptarët për vendime të rëndësishme të vitit që po vjen dhe le ta dëgjojmë sa më shumë njëri-tjetrin,jashtë llogoreve të ngushta partiake e llogjeve të mëdha provinciale! Ata s’kanë ç’humbin më ne s’kemi kohë për të humbur!
