Varrimi i Ilaria Sulës, studentes së re 22-vjeçare e cila u vra nga ish-i dashuri i saj, Mark Anthony Samson, po mbahet ditën e sotme në Bashkinë e Ternit.
Kortezhi i varrimit nis nga shtëpia ku jetonte e reja me prindërit e saj përpara se të shkonte në Romë për të studiuar Statistikat në Universitetin Sapienza.
Në krye të kortezhit të gjatë, kanë pjesë qindra njerëz, mes tyre edhe shumë të rinj, studentë dhe pedagogë nga shkolla në të cilën studionte.
Nga pamjet e publikuara nga mediat italiane, momente prekëse shfaqen kur nëna e Ilarias, Gëzime Sula shfaqet duke thirrur emrin e së bijës mes lotësh.
Ditët e fundit para shtëpisë së viktimës janë vendosur lule, kartolina dhe pankarta në kujtim të Ilarisë dhe kundër dhunës ndaj grave.
Babai i saj falenderoi “të gjithë qytetin, kryetarin e bashkisë dhe policinë dhe të gjithë njerëzit për solidaritetin ndaj familjes së tij”.
Në Terni, siç vendosi kryebashkiaku Stefano Bandecchi, pritet “shfaqja e flamujve në gjysmështizë në ndërtesat komunale” në shenjë zie.
Ndërkohë në Romë, në Sapienza, mësimet janë pezulluar në kujtim të Ilarias.
