Kryetarja e LSI, Monika Kryemadhi, një ditë para protestës ka mbledhur ish-grupin paralamentar të kësaj partie.
Në një prononcim për mediat, Kryemadhi tha se mbledhja ka në fokus organizmin e protestës. Kryetarja e LSI u shpreh se ka ardhur koha që politikanët të japin llogari para popullit.
Duke thaksuar se opozita po përgatitet për zgjedhje të parakohshme, ajo tha se protesta e nesërme do te jetë e madhe dhe se nuk do të ndalojnë as në ditët në vijim.
Përsa i përket djegies së mandateve, Kryemadhi tha se ishte një akt sensibilizime dhe se nuk mund të shkonin në një Kuvend ilegjitim.
Ajo komentoi dhe futjen e deputetëve të rinj në Kuvend duke thënë se ata janë futur aty nga Partia Socialiste.
” Protesta nuk ka të bëjë vetëm me protestën politike por edhe ekonomike, me atë varfëri që iu ka vajtur shumë thellë shqiptarëve. Në mbledhjen e sotme do të diskutojmë dhe për anën organizative të gjithë partisë, po bëhemi gati për zgjedhje të parakohshme.
Jemi të bindur dhe po njoftojmë të gjithë strukturat se Shqipëria shumë shpejt do të shkojë në zgjedhje të parakohshme për të pasur një parlament legjitim.
Djegia e mandateve është interes publik, ishte akti final i opozitës për të ndërgjegjësuar opinionin publik dhe atë ndërkombëtar për kapjen e shtetit. Protesta e nesërme është një vazhdimësi e protestave të shqiptarëve.”-tha Kryemadhi./ Opinion.al E.Xh.
