Duke dalë nga selia e Partisë Demokratike ku ka pasur një takim me Lulzim Bashën pas protestës së opozitës, Monika Kryemadhi ka dhënë një intervistë për mediat, ku tha se vera do të vijë me zgjedhje të parakohshme parlamentare. Kryemadhi tha se ky hap s’do të vijë nga Edi Rama, por nga anëtarë të tjerë brenda Partisë Socialiste.
“Nuk ka më dialog, të shkojmë drejt zgjedhjeve. Po të dilni nëpër rrethe, vetë socialistët po përgatiten për të shkuar në zgjedhje të parakohshme. Vera do të fillojë me zgjedhje parlamentare, jo lokale. Zoti Rama duhet ta bëjë këtë hap, por kam përshtypjen se s’do ta bëjë vetë ai. Socialistët gjithmonë kanë ndërruar kryeministra, ministra, kanë lënë dhe pushtete për të ruajtur Partinë Socialiste, jam e bindur që elemente brenda PS-së do ta çojnë drejt kësaj gjëja”, ka thënë Kryemadhi.
Ajo gjithashtu është shprehur se nëse Parlamenti s’do të ketë 140 deputetë, nuk do të quhet legjitim.
“Opozita i ka bërë të gjitha veprimet e saj, nuk po rri të rendis gjithë veprimet institucionale me propozimet, mendimet etj, dhe nuk po rri të përmend të gjitha shkeljet e rregullores së Kuvendit dhe Kushtetutës. Unë nuk quhem juriste, nuk jam doktoreshë në shkenca juridike, jam doktoreshë në shkenca kimike dhe ekonomike, Kushtetuta e Shqipërisë thotë se Parlamenti ka 140 deputetë. Është legjitim kur të ketë 140 deputetë, nëse do të ketë aq le të vazhdojë, por s’e besoj se do ta ketë shansin. Ka dosjen 339 me SHBA dhe Bashkimin Europian, me shtete të caktuara, ka dosjen 184 që e ka fshehur për zgjedhjet e vitit 2015, por edhe shumë dosje që lidhen me trafikun e drogës, krimin etj”, ka thënë Monika Kryemadhi./Opinion.al
