Kryebashkiakja e Barcelonës Ada Colau ka bërë thirrje gjatë të shtunës për qetësi dhe ndërprerje të protestave të dhunshme nga separatistët katalonas.
“Kjo situatë nuk mund të vazhdojë. Barcelona nuk e meriton këtë”, -tha Colau, duke shtuar se protesta e së premtes ka qenë më e rënda gjatë ditëve të fundit.
Protestuesit janë të zemëruar nga vendimi i Gjykatës Supreme që dënoi me burg nëntë liderë separatistë.
Separatistët radikalë janë përplasur me policinë që nga e hëna në disa qytete. Autoritetet deklarojnë se më shumë se 400 persona janë lënduar, shumë prej tyre efektivë policie, ndërkohë që janë arrestuar 150 persona.
Forcat e policisë kanë përdorur gaz lotësjellës të premten mbrëma për të shpërndarë protestuesit në Barcelonë.
