Mediat e huaja vijojnë t’i bëjnë jehonë golit alla “Panenka”, të shënuar nga Alban Hoxha në ndeshjen e kthimit të turit të dytë kualifikues të Ligës së Kampioneve, ndaj Ferencvaros. Portieri i kuq ishte heroi i vërtetë i kualifikimit historik të Partizanit më tej, në këtë kompeticion, sepse priti 3 penallti dhe e ktheu në gol të parën e të tillave, me një ekzekutim mbresëlënës. E përditshmja sportive kroate, “Sportske Novosti”, e konsideron si diçka të parë rrallë në stadiumet e ndryshme, atë që bëri Hoxha në Budapest, vetëm se i ngatërron emrin, duke mos e quajtur Alban, por Bekim.
Në fakt, ai ishte vërtetë një “bekim” për kalimin në turin tjetër të të tijve në Champions. Ja çfarë shkruan më konkretisht kjo media kroate, e cila publikon edhe videon e golit alla “Panenka” të portierit të kuq: “Me paraqitjen e tij, portieri shqiptar është bërë absolutisht një hero, pasi bëri diçka, që është parë rrallë! Mrekulli në Budapest, “bestselleri” i portierit të Partizanit lumturoi krejt kombin. Dhe emri i autorit është Bekim Hoxha.
Në ndeshjen e kthimit të Partizanit kundër Ferencvaros, për llogari të Ligës së Kampionëve, portieri shqiptar kreu një mini-mrekulli, që mahniti krejt Europën.. Hoxha, në fakt, priti tri penallti dhe shënoi në mënyrë spektakolare një të tillë! Për më tepër, për habinë e hungarezëve, goditja e parë e 11-metërshave, pasi 120 minuta loja nuk e nxorën dot të kualifikuarin më tej, u bë nga portiere Hoxha. Dhe, si një Panenka i vërtetë shënoi. Pastaj, ai priti tri penallti të kampionëve hungarezë, duke e kualifikuar Partizanin më tej.”
