Presidenti Ilir Meta thotë se kriza politike që ka përfshirë vendin mund të ishte shmangur. Në një konferencë për mediat me homologun e tij nga Sllovenia, Borut Pahor, kreu i shtetit shqiptar tha se partitë politike duhet të mendojnë për integrimin.
Ilir Meta: Nuk do doja të përqendroheshim në çështje të brendshme në këtë konferencë për shtyp, por nuk mund të ndalojë pyetjet tuaja. Shumë thjesht mund t’ju deklaroj se jemi në kushtet e një krize politike, kushtetuese dhe institucionale, e cila duhet dhe mund të ishte shmangur. Në mënyrë të vazhdueshme dhe sistematike kam apeluar për dialog mes palëve. Jo vetëm për të evituar këtë situatë, por t’i paraprirë atij vendimin të rëndësishëm që u paralajmërua qershorin e kaluar për hapjen e negociatave. Ndaj kam thënë që duhet të fillojë puna për dialog, pasi siç ikën një ditë mund të ikën dhe një vit dhe mbetemi përsëri në vend. Palët të bëjnë hapa pas dhe të reflektojnë më përgjegjshmëri për të vendosur normalitetin politik. Të mos biem nga interesi kombëtar, që duhet të na motivojë shumë fort për shkak të kohës që po pakësohet, duhet të na shtyjë drejt zgjidhjeve të mençura dhe zgjidhjeve politike.
Sa i përket bisedimeve mes Kosovës dhe Serbisë, kreu i shtetit shqiptar tha se Shqipëria nuk mund të marrë përsipër të dialogojë në emër të Kosovës. Ai iu bëri thirrje partive politike në Prishtinë që të gjejnë gjuhën e përbashkët për të arritur një marrëveshje për vazhdimin e dialogut me Serbinë. /Opinion.al
