Situata politike në vend po i ngjason gjithnjë e më shumë asaj para zgjedhjeve të vitit 2017, kur një marrëveshje Rama-Basha solli regjistrimin në garë të partive opozitare në shkelje të afateve. Tani opozita me një vendim të paprecedentë do të djegë mandatet e deputetëve. Ky vendim siç duket mund të sjellë dhe shtyrjen e zgjedhjeve lokale, ndërsa përfaqësuesit e PD-së dhe LSI gjatë emisionit të së hënës në “Opinion” deklaruan se në këtë situatë ku ndodhet vendi nuk mund të ketë zgjedhje. Por cila është historia e shtyrjes së zgjedhjeve në Shqipëri, në bazë të një marrëveshjeje politike?
–Në 10 shkurt 1991 në Shqipëri ishin dekretuar zgjedhjet e përgjithshme. Por në Dhjetor 1990, protestat e studentëve çuan në krijimin e Partisë Demokratike, partisë së parë të opozitës. Një forcë antikomuniste që synonte të rrëzonte nga pushteti Partinë e Punës. Koha që nga krijimi i PD deri në zgjedhje ishte e pamjaftueshme ndaj në Janar 1991, PD thirri dhe mbështeti një seri grevash që vunë në vështirësi Partinë e Punës dhe qeverisjen e shkalafitur të një vendi në uri kronike. Në mes të Janarit u firmos një marrëveshje që parashikonte shtyrjen e zgjedhjeve. Nga 10 Shkurti 1991 ato u shtynë në 31 Mars 1991.
–Shtyrja e dytë e zgjedhjeve ndodhi në Dhjetor 2006, kur zgjedhjet lokale, u shtynë sërish pas një marrëveshje mes partive politike në Presidencë dhe u mbajtën në Shkurt 2007. Shkaku i shtyrjes ishte këmbëngulja e Edi Ramës si kryetar i PS se problemi i çertifikatave me të cilat votonin shqiptarët nuk jepte siguri për zgjedhje të lira dhe se ato mund të vidheshin.
–Të freskëta, janë zgjedhjet e 2017 të cilat u shtynë për një javë, sërish pas një marrëveshjeje politike.
Por në një deklaratë për mediat gjatë muajit janar, kreu i KQZ-së Klement Zguri paralajmëroi se nuk ka ndërmend ta përsërisë më këtë skenar (të vitit 2017).
“Domosdoshmërisht duhet që partitë politike të respektojnë afatet dhe procedurat që ligji u ngarkon, kjo është e patolerueshme dhe nëse do të ketë raste të tilla, këto duhet të reflektohen në ligj, në Kodin Zgjedhor, pasi kjo është e vetmja rrugë dhe mundësi që KQZ-ja të vazhdojë më pas me vendimmarrjet e saj”, tha Zguri. Aktualisht, Komisionit Qendror të Zgjedhjeve i mungojnë dy anëtarë që duhet të propozohen nga opozita. G.F/ Opinion.al
