Të qënurit futbollist shpesh në syrin e njerëzve krijon idenë e personit të pasur, me makina të shtrenjta, dhe me femra të bukura të cilat të rrethojnë çdo natë. Në Shqipëri realiteti është krejt ndryshe. Futbollistët paguhen aq pak, sa ndonjëherë detyrohen ta lënë mënjanë këtë profesion për të zgjedhur diçka më fitim – prurëse. I tillë është edhe rasti i Bledar Lenës, ish-futbollist i Gramozit i cili ka hequr dorë nga futbolli për tu bërë berber.
“Kam luajtur në të gjitha kategoritë e futbollit shqiptar, por suksesin më të madh e kam arritur kur u ngjita në Superiore me Gramozin dhe me Kukësin. Jam aktivizuar në pjesën e dytë të ndeshjes ndaj Real Madrid dhe nuk e harroj, pasi të luash në një ndeshje të atillë të mbushur me yjë nuk harrohet asnjëherë. Por, një moment i thashë stop futbollit, pasi nuk luhej me plot strese. Futbollistët me atë rrogë mbahen, ndërkohë që njëherë e merrje njëherë tjetër jo. Tani jam berber dhe është një punë që e bëj me dëshirë. Futbollin e kam pasion, por kam një profesion që paguhet më mirë se një futbollist”, ka thënë në një intervistë për “Panorama Sport”, Bledar Lena.
Është sa tragjike, por aq edhe qesharake mënyra se si sporti në Shqipëri ka kaq pak vlerë. Jemi mësuar që shumë lojtarë shqiptarë, të cilët zgjedhin ekipe të huaja në vend të Shqipërisë t’i paragjykojmë, por jeta është luftë për mbijetesë, dhe njeriu kërkon më të mirën për veten.
