Prokurori i Përgjithshëm, Olsian Çela, ka zhvilluar ditën e sotme një takim në Prokurorinë e Fierit.
Njoftohet se Çela ka diskutuar për dy çështje kryesore, hetimin e krimeve zgjedhore dhe hetimet pasurore.
Gjatë një prononcimi për mediat, kryeprokurori Çela u shpreh se prokurorët duhet të hetojnë sa më shpejt dhe në mënyrë të plotë të gjitha krimet zgjedhore.
“Qëllimi i vizitës lidhet me situatën e hetimit të krimeve zgjedhore nga Prokuroria e Fierit. Janë disa takime që po bëhen në lidhje me krimet zgjedhore. Është e rëndësishme që të tregohet kujdes maksimal nga prokurorët për hetimin e plotë e të shpejtë, si dhe për të treguar transparencë.
Arsyeja e dytë ka të bëjë më hetimet pasurore dhe evazionin fiskal, funksionimi i një seksioni të posaçëm që Prokuroria e Fierit ka për pastrimin e produkteve të veprës penale dhe evazionit fiskal, për rritje të efikasitetit për evazionin dhe ligjin anti-mafia. Janë të rëndësishme rezultatet në këtë drejtim, pasi ka shumë kërkesa nga ndërkombëtarët për luftën ndaj pastrimit të parave, korrupsionin dhe krimin e organizuar”, tha kryeprokurori./Opinion.al
