Kreu i Inspektorit të Lartë të Drejtësisë, Artur Metani paraqiti sot misionin e këtij institucioni të ri kushtetues. Metani tha në një konferencë për mediat se institucioni që ai drejton është totalisht i pavarur nga organet e drejtësisë dhe pushteti ekzekutiv.
Sipas tij, ILD ka për objekt verifikimin e ankesave, hetimin e shkeljeve disiplinore dhe fillimin e procedimit disiplinor ndaj gjyqtarëve dhe prokurorëve të të gjitha niveleve.
“Sot kemi një institucion që nuk ka trashëguar asgjë nga e kaluara. ILD është një institucion i ri dhe i pavarur; kemi ngritur një strukturë provizore. Për ankesat, na pret një volum i lartë pune. 900 ankesa kanë kaluar në zyrën e Inspektorin e Lartë të Drejtësisë, një volum i madh për këtë institucion për periudhën 2019-2020. Shqetësimet janë kryesisht penale, civile, tregtare, administrative.
Po punojmë që ILD të jetë sa më parë funksional. Do të monitoroj çdo vendim Gjykate e Prokurorie. Nuk bëj vlerësime të sistemit, do të bëj vetëm detyrën time.
Të gjitha fenomenet janë shqetësuese, por prioriteti kryesor për momentin është fenomeni i lirimit të të burgosurve para kohe me kusht. Unë nuk kam detyrë të bëj vlerësime, kam detyrë të monitoroj vendimet e Gjykatave dhe Prokurorisë. Unë do të zbatoj detyrën që më kanë ngarkuar”. tha ndër të tjera Metani.
Ndërkaq i pyetur për faktin se emërimi i tij është kritikuar pasi është vëllai i një ish-ministreje të kabinetit Rama, Metani tha: “Koha është gjyqtari më i mirë për të gjithë”./Opinion.al
