Politologu Afrim Krasniqi analizoi takimet e krerëve të politikës për reformën në drejtësi dhe proçesin në tërësi gjatë një interviste në Ora News. Krasniqi deklaroi se pas bisedimeve që u duk se do ta çonin në një nivel të ri diskutimin për reformën, qëndrojnë axhenda paralele politike që sipas tij lidhen me konfigurimin e ri politik.
Sipas Krasniqit, ambasadorët e BE kanë pranuar se kërcënimi me integrimin për miratimin e reformës nuk funksionoi, ndaj ai sheh publikimin e dosjeve të korrupsionit si mekanizmin që do të çonte në një kompromis të politikës shqiptare.
Afrim Krasniqi: Janë të gjitha me një axhendë politike paralele që nuk lidhet me reformën në drejtësi, por me konfigurimin e ri politik dhe zgjedhjet e ardhshme parlamentare. Janë duke kërkuar pretekst për të përfituar nëse reforma në drejtësi dështon dhe për të gjetur argumenta kundër palës tjetër për të mbajtur flamurin e reformës, jo për tu marrë me thelbin e reformës dhe nevojën për një reformë në drejtësi.
Të gjthë Ambasadorët janë bashkuar në mendimin që nuk ecën më ky kërcënim sepse elita politike nuk e duan më integrimin, qytetarët nuk e kuptojnë dhe qytetarët nuk janë të gatshëm të protestojnë për integrimin, kështu që në mënyrë automatike nëse ne i kërcënojmë me integrimin, ne nuk kemi bërë asgjë.
I vetmi mekanizëm që funksionon është nëse Bashkimi Europian dhe Shtetet e Bashkuara të Amerikës përdorin variantin bjellorus, apo Venezuelës, do të thotë bëjnë publike dosjet korruptive të politikanëve. Vetëm kjo do ti detyrojë politikanët të arrijnë në kompromis.
Ajo që unë kam frikë është se faktori ndërkombëtar është i prirur gjithmonë për të zgjedhur stabilitetin në vend të demokracisë. Dhe ky do të jetë zhvillim negative për Shqipërinë.
Në aspektin e kushtetutshmërisë dhe legjitimitetit, kjo nuk është normale se ne quhemi vend sovran. Por imagjinoni sikur të mos jenë ndërkombëtarët në Tiranë çfarë ndodh.
