Komisioni Qendror i Zgjedhjeve ka konfirmuar se ka marrë informacion nga Prokuroria për heqjen e mandatit të deputetit Aqif Rakipi dhe Gledion Rehovica me arsyen se kanë fshehur të shkuarën e tyre kriminale.
Tashmë kërkesa është në dorën e KQZ, ndërsa kjo e fundit do të vendosë për pranimin ose rrëzimin e kësaj kërkese.
Mësohet se të mërkurën në mëngjes është lënë një konsultë mes anëtarëve të KQZ-së me njëri-tjetrin, pasi gjatë ditës së sotme (të martën) nuk kishte kohë ‘për të parë’ detajet e informacionit të dërguar nga Prokuroria.
Pas shqyrtimit të informacionit ditën e nesërme, vendoset nëse KQZ do të mblidhet për të vendosur nëse do t’i hiqet mandati apo jo deputetit Aqif Rakipi dhe Gledion Rehovica.
Ligji për dekriminalizimin u miratua në fillim të vitit 2016, pas një fushate gati dy vjeçare të Partisë Demokratike, që akuzoi shumicën se kishte përfshirë në listat për deputetë e kryetar bashkish persona me të shkuar kriminale.
Pas miratimit të këtij ligji, disa deputetë dhe kryetar bashkishë ranë në rrjetën e dekriminalizimit. Për disa zyrtarë të tjerë, ndaj të cilëve u kërkua heqja e mandatit, KQZ vendosi mes debateve se nuk kishte arsye të mjaftueshme për t’u hequr mandatin.
