Kryeministri i Kosovës, Albin Kurti, ka prezantuar këtë të martë vendimet e reja që janë marrë në kuadër të masave për përballimin e rritjes së çmimeve.
Kurti bëri të ditur se për muajin Prill do të shpërndahen nga 100 Euro për punonjësit e sektorit publik, të sektorit privat, për pensionistët, për studentët si dhe ushqime për familjet në nevojë.
“Dyfishim i mbështetjes për muajin prill për të gjitha familjet në asistencë sociale. Kjo mbështetje do të jetë mbi rritjen e përhershme prej 30%. 100 Euro shtesë për pensionistët për muajin prill. Do të përfitojnë të gjithë ata që marrin pension bazik, pension kontributpagues, pension për aftësi të kufizuar, pension të veteranit, e kështu me radhë. Me nga 100 Euro, për herë të parë, do të mbështesim të gjithë punëtorët e sektorit privat, rreth 300 mijë punonjës. 100 Euro shtesë do t’u ndahen edhe mbi 80 mijë zyrtarëve publikë. Me nga 100 Euro do të mbështeten për herë të parë rreth 80 mijë studentë të Republikës. 40 mijë pako ushqimore për shtresat më të cenueshme të shoqërisë tashmë kanë filluar të shpërndahen. Do të vazhdojmë mbështetjen për ofrimin e shujtave përmes kuzhinave popullore”, tha Kurti.
Kryeministri i Kosovës bëri të ditur gjithashtu se në mbledhjen e nesërme të qeverisë do të miratohet projektligji për t’i hapur rrugë rritjes së pagës minimale në 250 Euro neto, dhe për heqjen e tatimit për 250 Euro pagë./Opinion.al
