Ka ditë të tëra që në Kosovë ka një interesim të jashtëzakonshëm për ndeshjen Kosovë-Kroaci, por ndonëse luhet në “Loro Boriçi” të Shkodrës, që ka një kapacitet të konsiderueshëm, bileta në treg ka pasur shumë pak dhe kanë mbaruar me shpejtësi.
Ndërkohë, mediat kosovare denoncojnë sot skandalin me biletat, që kanë përfunduar në tregun e zi dhe shiten online me çmime disa herë më të larta sesa është çmimi real.
Ndryshe nga ndeshja e Shqipërisë ndaj Maqedonisë, biletat e Kosovë-Kroaci janë shitur lirisht, pa vendosur emrin e blerësit në biletë, ndaj nuk është çudi që ditën e ndeshjes në Shkodër të gjesh dhjetëra shitës biletash me çmime 50 euro e lart.
