Kosova po përballet me pasoja gjithnjë e më të mëdha nga kriza politike që ka bllokuar krijimin e institucioneve të reja pas zgjedhjeve të 9 shkurtit.
Komisioni Qendror i Zgjedhjeve po përgatitet për zgjedhjet lokale të tetorit, por nuk përjashtohet mundësia që brenda këtij viti të ketë edhe zgjedhje të përgjithshme, çka do ta çonte në tre numrin e proceseve zgjedhore për vitin 2025.
Vendimmarrja për hapat e mëtejshëm i takon Gjykatës Kushtetuese, e cila pritet të japë përgjigje deri më 8 gusht. Ndërkohë, mungesa e konstituimit të Kuvendit ka sjellë pasoja konkrete.
Sindikatat e Punëtorëve të Radiotelevizionit Publik të Kosovës (RTK) kanë njoftuar nisjen e protestës më 6 gusht, për shkak se buxheti për gjashtëmujorin e dytë nuk është alokuar.
Eksperti i ekonomisë Safet Gërxhaliu e cilëson situatën si një nga më të errëtat në historinë e re të Kosovës.
“Dëmet aktuale janë pothuajse 1 miliard e 200 milionë euro, përfshirë 830 milionë euro nga fondet e BE-së për reformat, projektet e financuara nga SHBA dhe tri marrëveshje me Bankën Botërore, dy të parat me vlerë 230 milionë euro dhe e treta 90 milionë euro, që tani janë të ngrira.”
Ndërkohë, Ambasada Gjermane në Prishtinë ka paralajmëruar se bllokada politike jo vetëm që po pengon aspiratat e ardhshme të Kosovës, por rrezikon gjithashtu progresin dhe besueshmërinë që vendi ka ndërtuar ndër vite./ Tv Klan
