Koronavirusi po përhapet me ritme më të shpejta në Europë dhe në Shtetet e Bashkuara ndërsa Kina raporton një ngadalësim të rasteve të reja dhe viktimave.
Sipas të dhënave deri në këtë moment në botë raportohen 121 mijë raste të konfirmuara nga të cilat rreth 66 mijë janë shëruar dhe 4,368 kanë vdekur.
Vendi më i prekur mbetet Kina, por situata duket se sa vjen e përmirësohet pasi numri i të vdekurve ka ngecur prej ditësh në rreth 3 mijë ndërsa pjesë më e madhe e rasteve të konfirmuara janë rekuperuar. Aktualisht vendi raporton rreth 16 mijë të infektuar aktivë.
Nga ana tjetër Irani raporton situatë të vështirë, teksa ditën e sotme është regjistruar rritja më e lartë e numrit të viktimave në një ditë, 63 të vdekur vetëm 24 orët e fundit.
Zëdhënësi i qeverisë tha se gjithsej janë 354 viktima që kur filloi shpërthimi i epidemisë muajin e kaluar por shifra e vërtetë besohet të jetë shumë më e lartë. Zëdhënësi shtoi se 24 orët e fundit janë konfirmuar 958 raste të reja, duke çuar numrin e përgjithshëm të infeksioneve në vend saktësisht 9,000.
Numri i rasteve ka njohur rritje në Europë, me Italinë e cila ka kaluar 10 mijë të prekur dhe që prej dy ditësh është në izolim të plotë. Që prej shpërthimit të epidemisë kanë ndërruar jetë 631 persona nga COVID-19 dhe 724 janë shëruar.
Britania ka regjistruar sot viktimën e tetë, një i moshuar i cili vuante nga simptoma të sëmundjeve shoqëruese. Ministrja e Shëndetësisë u raportua sot se kishte rezultuar pozitive në testin e koronavirusit dhe pritet që të njëjtit test ti nënshtrohet edhe kryeministrit Johnson. Aktualisht Mbretëria e Bashkuar ka 382 raste të konfirmuara.
Ditën e djeshme Kancelarja Merkel deklaroi në mbledhjen e grupit të saj parlamentar se sipas analizës së ekspertëve nëse nuk krijohet një vaksinë, 60-70% e gjermanëve do të preken nga koronavirusi. 3 persona kanë ndërruar jetë në Gjermani nga rreth 1,600 të prekur. Panoramë të zymtë parashikoi edhe Presidenti Macron për gjendjen, teksa vendi i tij numëron 30 viktima dhe rreth 1,700 të prekur.
Numri i personave të infektuar ka kaluar 1.000 në Shtetet e Bashkuara të Amerikës.
Dhjetëra raste janë lidhur me një konferencë të mbajtur në një hotel në Boston në shkurt. Raste të tjera janë shfaqur në azile të moshuarish rreth Seattle në shtetin Uashington. Në rang kombëtar janë regjistruar 5 viktima më shumë ditën e fundit duke e çuar gjithsej në 31 numrin e përgjithshëm.
Nga vdekjet më të fundit, dy ishin në shtetin Uashington dhe kishte një në New Jersey, South Dakota dhe California. Nëntëmbëdhjetë shtete kanë shpallur gjendjen e emergjencës, raportoi Washington Post. /Opinion.al
